IBEN MONDRUP

iben mondrup

Tabita aamma Vitus pillugit oqaluttuat siullermik qallunaanut atuartussanut allataapput, tamannalu naleqquttuuvoq nammineq misigisarakku qallunaarpassuarnit Kalaallit Nunaata aamma Danmarkip ataatsimut oqaluttuarisaanermi ataatsimoorussaat ilisimaneqanngitsut.

Nammineerlunga tuparujussuarpunga taakku qitornavissiarineqarnerisa qanoq imartutiginerat aamma aaqqissuugaanngitsinerat paasigakku.

Taamaattumik uannut aamma qatanngutigiit taakkua marluk aallaavigalugit oqaluttuamik oqaluttuarnissara pingaaruteqartorujussuuvoq, pissutigalugu atuartussat pisumut tamatumalu kingunerisinnaasaannik paasinninnerussasut misigigama.

Nammineq Kalaallit Nunaata aamma Danmarkip akornanni pissutsit pillugit oqallinnermik uanga aallartitseqataasimasutut isumaqanngilanga, tamannami atuakkap Tabitap saqqummersinneqarnera ukiut arlallit sioqqullugu allaaserineqartarpoq.

Uanga oqaluttuara pisumut annertunerusumut, sunniinermut, annertusiartortumut tunnganeruvoq. Piffissanngorpat oqaluttuarpassuit takorluukkiat takorluukkiaanngitsullu saqqummertarumaarput.

Oqartariaqarporlu Tabitap saqqummersinneqarnerata nalaani tamanna pisoq, peqatigitipajaarlugumi atuagassiami Dagbladet Information-imi aviisiliortoq aviisimi ilannguttagassanik nangeqattaartumik allaaserinnilluni aallartissimavoq, kalaallit Danmarkimi qitornavissiarineqartut namminneq oqaluttuartittarlugit pillluni. Uangalu nammineq suliannut attuumassuteqanngillulinnarpoq, aamma marluulluta immikkut taamatut suliaqarsimanerput ilisimanngilarput.

Isumaqarpunga atuakkiortut amerlanerit pingaartitatik aallaavigalugit allattartut. Kalaallit Nunaannilu 70-ikkunni aamma 80-ikkunni alliartorsimasutut uanga nunasiaataanerup nalaani meeraavunga, naak aamma qallunaanik angajoqqaaraluarlunga. Inuiaqatigiinni isummersuutinik assortuuffiusuni peroriartorsimagaanni imminut avatangiisillu pillugit erseqqissumik isummernissaq pinngitsoorneqarsinnaanngilaq, tamannalu pigiliunneqartarpoq.

Pigiliussallu taakku suli ullumikkumut soqutigisarilersippaat Kalaallit Nunaata Danmarkillu akornanni qanoq pisoqarneranik, pingaartumik Danmarkip inissisimanerata aamma kalaallinut qanoq iliuuseqarsimanera pillugu.

Kalaallit Nunaanni najugaqarnissara maqaasisaqaara, akuerivarali aamma Kalaallit Nunaanni pisorpassuaqarnera uanga allatulli peqataaffiginngisannik. Misigisimavunga aamma sunniuterpassuarnut peqataarusussinnaananga.

Taarsiullugu eqqartugassat pillugit sunniuteqarsinnaaninnut periarfissaqarluarneruvunga Danmarkimi najugaqartillunga, assersuutigalugu qulequtaq qitornavissiartaarneq pillugu.

Nuummut angerlaqqinnissara assorsuaq qilanaarivara.

Iben Mondrup, 52-inik ukiulik, Kalaallit Nunaanni pisunik arlalinnik atuakkiaqarpoq.

Kalaallit Nunaanni alliartorsimavoq, 3-nik ukioqarnerminniit 18-inik ukioqalernissaminut nunatsinniissimagami.

Iben Nuup Nunat Avannarliit Kulturikkut Pikialaartitsisarneranut 2021-mi pisussamut qaaqqusaavoq, tassani atuakkiani ”Tabita” Nunatta Atuagaateqarfiani oqaluttuarissavaa.

Malitsissaalu ”Vitus” 2022-mi januaarimi saqqummersinneqarnissaa naatsorsuutigineqarpoq.

Allaatiginnittuuvoq Maasi Brøns, praktikkertoq NAPA - Nunani Avannarlerni Piorsarsimassutsikkut Attaveqaat-miit