Skandinaviamiut pop-imik nipilersortartui kalaallillu eqqumiitsuliortui nuimasut: Nuuk Nordisk Kulturfestivalip pilersaarutai maanna piareerput

Qaammatip ataatsip missaa qaangiuppat ukioq manna Nuuk Nordisk Kulturfestival pisussaq aallartissaaq, tassanilu danskit nipilersortartuinit tusaamasanit Alexander Oscar, Pernille Rosendahl-mit kalaallit eqqumiitsuliortuinut ilisimaneqarluartunut Jessie Kleemann, Da Bartali Crew, Makka Kleist, Karina Møller, Tarrak, Alexander Montgomery-Andersen aallarpassuarnillu imaqartitsissalluni.

Ukioq manna Nuuk Nordisk Kulturfestival oktoberip arfineq aappaanni aallartinneqassaaq, Nuuk Nordiskillu oqaluttuarisaanerani festivalit aatsaat pingajussaa ingerlanneqassalluni. Taamaakkaluartorlu festivalimi eqqumiitsuliornerup silarsuaani inuit ilisimaneqarluartut saqqummiussassat katitigaanerata assigiinngisitaarluarnerat iluatsinneqarsinnaasimavoq.

Pilersaarut maanna naammassineqarsimalerpoq, tassanilu nunani avannarlernit ilisimaneqarluartut arlallit peqataasussanngorput – minnerunngitsumillu kalaallit eqqumiitsuliortut pikkorissorsuit, nipilersortartunit, assilialiortartunit atuakkiortunut, qitittartunut isiginnaatitsisartunut allarpassuarnillu imaqartinneqassalluni.

”Nuuk Nordisk Kulturfestivalip 2015-imi pilersinneqarneranut tunngaviusumik pilersinneqarnerani suna siunertaasimanersoq uagutsinnut qiviallaajuarnissaa pingaaruteqarpoq. Kissaatit ilagaat nunanit allaneersunit eqqumiitsuliortunik Kalaallit Nunaat illoqarfittut pingaarnissaanut aggersaanissaq, taamaattorli pingaarnerpaajuarluni sumiiffigisami eqqumiitsuliortut pikkoriffimminnik saqqummiussinissaannut periarfissinneqartuarnissaat, tamakkulu festivalip ingerlannerani sapaatip akunneranik sivisussusilimmi periarfissaqassapput. Festivali eqqumiitsuliortutut nunanit avannarlernit isiginnaartoqarluni saqqummernissamut periarfissiisoq,” taama oqarpoq Nuuk Nordisk Kulturfestivalimi ataqatigiissaarisoq Jonas Nilsson.

Kalaallit eqqumiitsuliortut ukioq manna peqataasussat ilisarisimalluakkavut amerlasuut ilaatigut makkuupput; Da Bartali crew, elektroniskiusumik nipilersoqatigiit Nuummeersut, assilialiortartoq Jessie Kleemann, hollywoodimi isiginnaartitsisartoq Makka Kleist, erinarsortartoq taalliortorlu Karina Møller, rapimik erinarsortartoq tusaamasaq Josef Tarrak kiisalu assinik kusanartuliortartoq Ivínguak` Stork Høegh.

Nuuk Nordisk Kulturfestivalip isiginnaartut kisiisa aliikusersornissaat siunertarinngilaa. Aammattaarli siunertaavoq eqqumiitsuliortut assigiinngitsut imminnut taamatullu inunnik isiginnaartunik assigiitsutigut naapitsinissaat, eqqumiitsulioriaatsillu akimorlugit isumassarianik avitseqatigiinnissaat. Nuuk Nordisk Kulturfestivalip ingerlanerani misilittakkatik ilisimasatillu kulturiminnut eqqumiitsuliaminnullu tunngasut annertuunut annikikkaluartunulluunnit, qanittumit ungasissumiilluunnit aggertunut ingerlateqqissinnaassavaat,” taama oqarpoq Madelaine Gordon Graadahl, taannattaaq Nuuk Nordisk Kulturfestivalimi ataqatigiissaarisuusoq.

Danskit nipilersortartui tusaamasat pilersaarummi ilaapput

Kalaallit eqqumiitsukliortut arlallit peqataanerisa saniatigut nunanit avannarlernit tamanit eqqumiitsuliortut aamma peqataassapput. Tamakku akornanni nunanit allaneersunit atit ilisimaneqarluarnerpaat pilersaarummi nassaassaasut ilagaat siusinnerusukkut danskit nipilersoqatigiit Swan Lee-mi rockimillu nipilersoqatigiinni The Storm-imi erinarsortuusimasoq Pernille Rosendahl. Danskeq taanna 47-nik ukiulik kisimiilluni nipilersortarnermigut ilisimaneqarlualerpoq ukioq kingulleq tv-kkut aliikkutassiami ”Toppen af poppen”-imi TV 2-mi hundrede tusindilikkaanik isiginnaartulimmi peqataareernermi kingorna.

”Ukioq manna festivaleqartoqarnissami Pernille Rosendahlip peqataanissaa nuannaarutigisorujussuuarput. Amerlasuunit ilisarisimaneqarnera kisiat pinnagu, aammali erinarsullaqqissuuvoq, isiginnaartunullu, erinigeqaarpullu tusarnaartunut nittarsaannissaa. Tusarnaartitsinera ukioq manna tusarnaarianut puigunaanneroaanut ilaanissaa qularinngilarput,” taama oqarpoq ataqatigiissaarisoq Jonas Nilsson.

Pilersaarummi danskeq nipilersortartoq nuannarineqarluartoq alla aamma takussaavoq, pop-imik nipilersortartoq tusaamasaq inuusuttunnguaq århusimiu Alexander Oscar.

Nipilersukkamik ”Number”-mik Alexander Oscar amerlanernit ilisimaneqaatigilerlugu tusaamasaalerpoq. Ateq Alexander Oscar ilisarisimanngikkukku nipilersugaatigut ilisarineqarluarsinnaavoq. Nipilersugaq ”Number” 2018-mi P3-mi nuannarineqarluarpoq, nipilersorneqarluartartunullu ilaalluni, taamatullu Spotify-mi 20 millionit pallillugit tusarnaarneqarsimalluni.

”Alexander Oscarimik tusarnaariarneq nuannaffiussaqaaq. ”Number” inunnik qittatsitsilinngippat qularnaatsumik nuannarineqaataa kingulleq ”Complicated” qularnanngitsumik qittatsitsissaaq. Danskit popimik niplersortartoq tusaamasanngupiloortoq Nuummut tikilluaqqunissaanut qilanaaqaagut – minnerunngitsumillu nipilersugaata tusarnaarianut saqqummiunnissaat qilanaareqalugu,” taama oqarpoq ataqatigiissaarisoq Madelaine Gordon Graadahl.

Kingullermit annikinneq

2017-mi festivalip pilerneqanit eqqumiitsuliortut peqataasartut 2017-mi amerlipiloorsimapput – ukioq mannali Nuuk Nordisk Kulturfestival kingullermit minnerussaaq. Tamanna pissuteqarpoq neriuutigineqarmat sumiiffimmi tusarnaariat annertunerusumik soqutiginnermik takutitsinissaat.

”2017-mi annertuumik ineriartorneq takuarput, festivalitullu nutaajugatta taama ineriartupiloornissamut malinnaasinnaanngikkallarpugut. Taamaattumillu peqataasussat ikinnerunissaanik aalajangiussaqarsimavugut, Nuummilu festivalertoqarnissaa ukkatarinerusimallugu. Tassuunakkut qulakkiissavarput NNK2019-mi peqataasussat takulluarneqarnissaat, illoqarfiullu inuinut tamanut festivaliunissaa qulakkeerusullugu,” taama oqarpoq Madelaine Gordon Graadahl.

Festivalimut pilersaarut tamakkiisoq nittartakkami uani takuneqarsinnaavoq www.nuuknordisk.gl – malinnaaffigilluassavallu, piffissami ungasissorsuunngitsumi festivali elektroniskiusumik saqqummeeqqissaat, tassanilu pilersaarut takuneqarsinnaajumaarportaaq.