Ammaanersiornermi kalaallit tusaamasat akeqanngitsumik tusarnaarneqarsinnaapput: Nuuk Nordisk Kulturfestival 2019 ammaanersioqataaffigiuk
Nuuk Nordisk Kulturfestivali oktobarip arfineq-aappaani aallartippat innuttaasunut soqutiginnittunut tamanut akeqanngitsumik peqataasoqarsinnaassaaq. Ammaanersiornermi isiginnaartitsisussat ilagai rappertartoq Josef Tarrak, isiginnaartitsisartoq Klaus Geisler, taalliortoq Aka Niviâna aamma erinarsortartoq Nina Kreutzmann Jørgensen.
Nuuk Nordisk Kulturfestivalimi pisussat ulluni 7-13. oktobarimi sap. ak. 41-mi allattorsimaffiat piareerpoq. Nuummi innuttaasut ammaanermi qaaqquneqarput.
Ammaanersiorneq ataasinngornermi 7. oktobarimi nal. 17.00-imi pissaaq, tamanullu peqataarusuttunut ammavoq. Takutitsineq Nuuk Centerimi pissaaq, silalu ajussanngippat nal.16.55-imiit silami qitinnermik isiginnaartitsinermik aallarniisoqassaaq. Qitinnermik isiginnaartitsineq Nuuk Centerip isaariarsuata eqqaani H.J. Rinkip Aqqutaani pissaaq.
Qiajuk Dance Studios-imiit qitittartut aallarneereerpata kingorna ammaanersiorneq Nuuk Centerip paarlersuani pissaaq, tassanilu eqqumiitsuliortut arlallit takutitsissallutik.
Nal. 17.00 borgmesteri Charlotte Ludvigsen pisortatigoortumik tikilluaqqusilluni oqalugiassaaq, kingornalu isiginnaartitsinerit aallartissapput, ilaatigut rappertartoq tusaamasaq Tarrak aamma erinarsortartoq Nina Kreutzmann Jørgensen.
”Isiginnaartitsineq qanilaartuussaaq, tassami festivalimi qulequtaavoq ”home” (angerlarsimaffik) – pisussani tamani malunniuttussaq. Pisut tamarmik aallaqqaataaninngaanniit naanissaata tungaannut pikkunartuussapput, taamaammat misigisassaasumik nalliuttorsiorpalaartumik misigisaqarusukkaanni Nuuk Centerip paarlersuanut inissarsinissaq isumannaartariaqassaaq”, Jensia Højgaard Dam-Davidsen ammaanersiornermut atatillugu ataqatigiissarisoq sapaatip akunneratalu ingerlanerani erisarsortussaq oqarpoq.
Ammaanersiornermi Aka Niviâna taalliaminik atuassaaq, Nordisk Koncertkor tusarnaarneqarsinnaapput aamma qulit missaanniittut uaajeeqatigiissapput, ilaatigut Elias Josefsen aamma Reumertimik Danmarkimi isiginnaartitsisartunut nersornaammik akimanerpaamik kalaaleq siulle nersornaasiligaanikoq Klaus Geisler.
”Nuuk Nordisk Kulturfestival tassaasoq Nunani Avannarlerni kulturimik pikialaartitsineq –ammaanersiornermi misigineqarluassaaq. Eqqumiitsuliornerit kulturillu sorparsuit takuneqarsinnaajumaarput, pingaartumik qanga kalaallit ileqqui tupinnartut. Aammattaaq eqqumiitsiliornermi assigiinngissutsit tamanilli ataqatigiissitsisut saqqummiunneqarumaarput”, Jensia Højgaard Dam-Davidsen oqarpoq.
Ammaanersiorneq Nuuk Nordisk Kulturfestivaleqarnermi pisussarpassuit ilagiinnarpaat, tamanut ammasoq. Sapaatip akunnerani pisussanut peqataarusuttut festival-tajaq 800 koruunilik pisiarisinnaavaat. Bilitsit ullormut atuuttut 300 koruuneqassapput. Piumassutsiminnik ikiuuttoqarsinnaavoq taamannallu festival-tajamik pissarsissutigineqassaaq. 16-it ataallugit ukioqaraanni festivali tamaat akeqanngilaq -taamaakkaluartoq festivalimut atuuttumik tajaqartariaqarpoq. Nuuk Centerim tuniniaanerit agguaassinerillu 4. oktobarimi aallartissapput.
Ammaanersiornermut atatillugu ataqatigiissaarisoq tusarnaarusukkaanni Naluttarfik Malimmukartoqarsinnaavoq sisamanngornerrmi oktobarip qulingani unnukkut. Tassani Jensia Højgaard Dam aamma erinarsortartut pingasut allat tusarnaartitsissapput nal. 21-imiit tiimialunni.